რუსმა მილიარდერმა დიდ ბრიტანეთში სასამართლო წააგო - მის წინააღმდეგ სანქციები ძალაში რჩება

ამის შესახებ "ევროპეისკაია პრავდა" იტყობინება Reuters-ის სააგენტოზე დაყრდნობით.

დიდმა ბრიტანეთმა შვიდლერს სანქციები 2022 წლის მარტში დაუწესა მისი კავშირების გამო საფეხბურთო კლუბ „ჩელსის“ ყოფილ მფლობელ რომან აბრამოვიჩთან და ასევე იმის გამო, რომ ის რუსული ფოლადის მწარმოებელი კომპანია „ევრაზიის“ ყოფილი დირექტორია.

რუსი ოლიგარქი ამტკიცებდა, რომ ბრიტანეთის სანქციებმა მისი ბიზნესი გაანადგურა და უარყოფითი გავლენა მოახდინა მასა და მის ოჯახზე. მან ასევე აღნიშნა, რომ ბრიტანეთში დაწესებული შეზღუდვებით რუსეთთან დაკავშირებული ყველა მილიარდერი არ დაზარალებულა.

თუმცა უზენაესმა სასამართლომ შვიდლერის სააპელაციო საჩივარი 4 ხმით 1-ის წინააღმდეგ უარყო და დაადგინა, რომ არსებობს „რაციონალური კავშირი“ სანქციებსა და მიზანს შორის.

მოსამართლეების თანახმად, შვიდლერის წინააღმდეგ სანქციები „მკაფიო სიგნალს უგზავნის ბატონი შვიდლერის მდგომარეობაში მყოფ ადამიანებს, რომ მათთვის გონივრული იქნებოდა რუსული ბიზნესისგან გამიჯვნა“.

29 ივლისს გამოტანილი ცალკე გადაწყვეტილებით, დიდი ბრიტანეთის უზენაესმა სასამართლომ ასევე უარყო რუსი ბიზნესმენის, სერგეი ნაუმენკოს, სააპელაციო საჩივარი. მისი 44 მილიონი ევროს ღირებულების სუპერიახტა ლონდონშია დაკავებული.

ბრიტანეთის მთავრობამ ადრე განაცხადა, რომ შესაძლოა, რუს ოლიგარქ რომან აბრამოვიჩს უჩივლოს, რათა “ჩელსის” საფეხბურთო კლუბის გაყიდვიდან მიღებული 3.2 მილიარდი დოლარი ჰუმანიტარულ ფონდში გადარიცხოს.