1 დეკემბერს რადიო თავისუფლების „დილის საუბრების“ სტუმრები იყვნენ იზა ბოდოკია, შიდსით დაავადებულთა დახმარების ფონდის ხელმძღვანელი და ანა ასლანიკაშვილი, დაავადებათა კონტროლის ეროვნული ცენტრის ეპიდემიოლოგი. მათ ისაუბრეს აივ-ინფექციით ინფიცირებისა და მკურნალობის შესაძლებლობებზე.
საქართველოში 6 ათასი აივ-ინფიცირებულია. თუმცა სპეციალისტები ვარაუდობენ, რომ რეალური რაოდენობა 10 ათასამდე შეიძლება მერყეობდეს. ამ მაჩვენებლის მიხედვით, ითვლება, რომ საქართველოში ვირუსის გავრცელების მაღალი დონეა. აივ-ინფექციის ტესტი და შემდეგი მკურნალობა მთლიანად უფასოა, თუმცა, როგორც „დილის საუბრების“ სტუმრებმა განაცხადეს, დაბალი ცნობიერების გამო დაავადების გამოვლენა მძიმე სტადიაზე ხდება, რაც ინფექციის მართვას ართულებს; ასევე მთავარ გამოწვევად რჩება ქვეყანაში ინფიცირებულთა მიმართ სტიგმის დაძლევა.
