27 იანვარს რადიო თავისუფლების "დილის საუბრების" სტუმარი იყო არასამთავრობო ორგანიზაცია „სამართლიანი არჩევნებისა დემოკრატიის საერთაშორისო ორგანიზაციის“ აღმასრულებელი დირექტორი მიხეილ ბენიძე. მან ისაუბრა სახელმწიფო საკონსტიტუციო კომისიის მუშაობის ფარგლებში დაგეგმილ საარჩევნო სისტემის ცვლილებებზე.
მიხეილ ბენიძის თქმით, სახელმწიფო საკონსტიტუციო კომისიაში საარჩევნო სისტემის ცვლილებასთან დაკავშირებული რამდენიმე სამუშაო ვარიანტია შესული. მათ შორის ერთი, რომელიც „სამართლიანი არჩევნების“ მიერაა ინიცირებული, ითვალისწინებს საარჩევნო სისტემის შექმნას, სადაც მაჟორიტარულ სისტემას, ერთიანი სამხარეო სისტემა ჩაანაცვლებს. შესაბამისად 150-მანდატიან პარლამენტში 75 დეპუტატი აირჩევა ერთიანი პროპორციული, ხოლო 75 დეპუტატი სამხარეო პროპორციული წესით. განსახილველ ვარიანტებს შორისაა, ვახტანგ ხმალაძის მიერ შეტანილი სრულად სამხარეო პროპორციულ სისტემაზე გადასვლის ვარიანტი და ვახუშტი მენაბდის მთლიანად ერთიან პროპორციულ სისტემაზე გადასვლის ვარიანტიც. მიხეილ ბენიძე შეეხო, ასევე პრეზიდენტის არაპირდაპირი წესით არჩევის თემასაც და განმარტა, რომ ამგვარი ინიციატივა საკონსტიტუციო კომისიაში შემავალ არც პოლიტიკურ და არც საზოგადოებრივი ჯგუფებს არ წარუდგენია.
