სტრასბურგის სასამართლოს მიმართა ექვსმა ორგანიზაციამ, მათ შორის ერთმა დამოუკიდებელმა მედიასაშუალებამ. ესენი არიან:
- „საერთაშორისო გამჭვირვალობა - საქართველო“ (TI);
- „ეკონომიკური პოლიტიკის კვლევის ცენტრი“ (EPRC);
- „კანონის უზენაესობის ცენტრი“;
- „საქართველოს ევროპული ორბიტა“;
- „სამოქალაქო მოძრაობა თავისუფლებისათვის“;
- „პუბლიკა“.
„საჩივარი შეეხება როგორც რეპრესიულ კანონმდებლობას, ასევე ამ კანონების საფუძველზე დაწყებულ კონკრეტულ ქმედებებს - კერძოდ, ზოგიერთი მოსარჩელის მიმართ ანტიკორუფციული ბიუროს მხრიდან დაწყებულ მოკვლევას“, - იუწყება „საერთაშორისო გამჭვირვალობა - საქართველო“.
„ჩვენ ვდავობთ, რომ ხელისუფლების მიზანი არის არა კანონების აღსრულება, არამედ განსხვავებული აზრის ჩახშობა და ჩვენი საქმიანობის შეჩერება, რომ ვეღარ შევძლოთ ადამიანების დახმარება“, - აცხადებს TI.
„ეს კანონები ფუნდამენტურად ეწინააღმდეგება გაერთიანებისა და გამოხატვის თავისუფლებებს, კერძო ცხოვრების ხელშეუხებლობის უფლებას, სამართლიანი სასამართლოსა და სხვა უფლებებს“, - მიიჩნევენ მოსარჩელეები.
რადიო თავისუფლების ინფორმაციით, საერთო სარჩელით მოთხოვნილია ადამიანის უფლებათა ევროპული კონვენციის რამდენიმე მუხლის დარღვევების დადგენა. მათ შორის:
- გამოხატვის თავისუფლების (მე-10 მუხლი);
- შეკრებისა და გაერთიანების თავისუფლების (მე-11 მუხლი);
- პირადი ცხოვრების პატივისცემის (მე-8 მუხლი) უფლების;
- სამართლიანი სასამართლოს (მე-6 მუხლი) უფლების;
- ასევე, მე-7 („არავითარი სასჯელი კანონის გარეშე“) და მე-18 (უფლებათა შეზღუდვის გამოყენების ფარგლები) მუხლების დარღვევას.
„ქართული ოცნების“ ხელისუფლება, ერთი მხრივ, FARA-ს დარღვევას ედავება სხვადასხვა ორგანიზაციას, მათ შორის TI-ს, მეორე მხრივ კი „საბოტაჟის საქმის“ სისხლის სამართლის გამოძიების ფარგლებში იძიებს სამოქალაქო საზოგადოების ორგანიზაციების საქმიანობას.
ასევე ნახეთ ანტიკორუფციულმა ბიურომ არასამთავრობო ორგანიზაციებს კვლავ გაუგზავნა წერილისწორედ ამ საქმის ფარგლებში შვიდი არასამთავრობო ორგანიზაციის ანგარიშებს დაადეს ყადაღა. რამდენიმე მათგანის წარმომადგენლები უკვე გამოჰკითხეს.
დღეს, 5 სექტემბერს, მაგისტრატ მოსამართლესთან გამოკითხვის დასრულების შემდეგ მედიასთან საუბარში „სოციალური სამართლიანობის ცენტრის“ ხელმძღვანელმა თამთა მიქელაძემ თქვა, რომ „ამ პროცესების მიზანი არის სამოქალაქო საზოგადოების განადგურების გეგმის გადაფარვა“.
ასევე ნახეთ "წიწაკის სპრეი" შევიძინეთ თანამშრომელი ქალებისთვის, სასტიკ რეალობაში თავის დასაცავად" - თამთა მიქელაძე გამოკითხვაზე