პოლიციის ჩინოსნისთვის ქრთამის შეთავაზების შემდეგ ორი ადამიანი დააკავეს - საქმე ხე-ტყის უკანონოდ ჭრას ეხება

გამოძიების ვერსია ასეთია:

• ორმა კაცმა ხე-ტყის უკანონო მოპოვების და მასალის შეუფერხებლად გადაადგილების მფარველობისთვის მიმართა შსს-ის თანამდებობის პირს;
• საუბარია რაჭა-ლეჩხუმის და ქვემო სვანეთის პოლიციის დეპარტამენტის „ერთ-ერთ ხელმძღვანელზე“, - ვინაობა დაზუსტებული არ არის;
• მას 5000 ლარი შესთავაზეს ქრთამის სახით, სამომავლო, ხის მასალით დატვირთული თითოეული სატვირთო ავტომანქანის „შეუფერხებელი გადაადგილებისთვის“ კი სისტემატურად 2000 ლარს დაპირდნენ.
• პოლიციელმა პროკურატურისთვის „ოპერატიულად მიაწოდა ინფორმაცია“ და გამოძიება დაიწყო.
• დღეს, 20 ივნისს, მათ ქრთამის ნაწილი, 3000 ლარი, გადასცეს საჯარო მოხელეს, რის შემდეგაც ორივე მათგანი დააკავეს.

პროკურატურის განცხადების თანახმად, ისინი „ქრთამის მიცემის“ ბრალდებით დააკავეს - სისხლის სამართლის კოდექსის 339-ე მუხლის მეორე ნაწილით.

ბრალის დამტკიცების შემთხვევაში, მათ შვიდ წლამდე პატიმრობა ემუქრებათ.

პროკურატურა აცხადებს, რომ „მსგავსი დანაშაულის წინააღმდეგ ბრძოლა ერთ-ერთ მთავარ პრიორიტეტს წარმოადგენს“ და ამაზე „უმკაცრეს სისხლის სამართლის პოლიტიკას გაატარებს“.