შსს-ს თანამშრომელი ლევან ბურდული, ზურაბ გუგულაშვილის მოწმე: ის იყო აგრესიული, იყო სველი, ვერ გახდა მისთვის შემაკავებელი ვერც მოწოდება და ვერც წყლის ჭავლი. ხელის ჟესტიკულაციით, პოლიციის მისამართით, გვეძახოდა მონებს.
ზურაბ გუგულაშვილის ადვოკატი: რას გეძახდათ ის? მონები ხართო? დაახლოებით რამდენჯერ? ბევრჯერ? ტელეფონით რომ გადაგეღოთ?
შსს-ს თანამშრომელი ლევან ბურდული: ამ არეულობაში მაგის დრო არ იყო.
ზურაბ გუგულაშვილის ადვოკატი: რამდენ ხანს აკვირდებოდით ზურაბს? სად დაინახეთ? პარლამენტის წინ? ქაშვეთის მხარეს? მიუთითეთ გდდ-ს თანამშრომელს, რომ დაეკავებინა? თქვენ როგორ მიეცით ეს დავალება? ე.ი. ის გემორჩილებათ?
შსს-ს თანამშრომელი ლევან ბურდული: არ მაქვს პასუხი.
მოსამართლე: თქვენს მოთხოვნას დაემორჩილა ის?
შსს-ს თანამშრომელი ლევან ბურდული: კი.
ზურაბ გუგულაშვილის ადვოკატი: რამდენ ადამიანს მიეცით დავალება, რომ დაეკავებინათ?
შსს-ს თანამშრომელი ლევან ბურდული: ორს.
ზურაბ გუგულაშვილის ადვოკატი: დაახლოებით რამდენ ხანს გრძელდებოდა მონის დაძახება?
ლევან ბურდული: დროს ხო არ ვითვლი.
შსს-ს თანამშრომელი ჯაბა დიღმელაშვილი, მოწმე ნოდარ ჯაფარიძის საქმეზე.
მოსამართლე: თქვენ დაინახეთ, რომ იყო მოწოდება, რო დაეტოვებინათ დემონსტრანტებს ტერიტორია, ჰქონდა ბატონ ნოდარს ტერიტორიის დატოვების შესაძლებლობა? სად იდგა ის?
შსს-ს თანამშრომელი ჯაბა დიღმელაშვილი: მას ჰქონდა შესაძლებლობა დაეტოვებინა ეს ტერიტორია. ის იდგა იმ ჯგუფის გვერდით, რომელიც იყო აგრესიული, მაგრამ კონკრეტულად ის რაიმე განსაკუთრებულ აგრესიას არ გამოხატავდა.
მოსამართლე: ვინ დააკავა ის?
შსს-ს თანამშრომელი ჯაბა დიღმელაშვილი: გდდ-ს თანამშრომლებმა ჩემი და ჩემი კოლეგის მითითებით.
ადვოკატი: თქვენ თქვით, რომ ბატონ ნოდარს შეეძლო დაეკავებინა ტერიტორია.
შსს-ს თანამშრომელი ჯაბა დიღმელაშვილი: ნოდარს შეეძლო დაეკავებინა ტერიტორია, ყველა მხრიდან არ იყო ჩაკეტილი ტერიტორია, ჩემი აზრით, მას შეეძლო დაეტოვებინა ტერიტორია.
ნოდარ ჯაფარიძე: გდდ-ს თანამშრომელმა ტელეფონი ამომიღო ჯიბიდან.
შსს-ს თანამშრომელი ჯაბა დიღმელაშვილი: ისინი ისე არიან აღჭურვილნი, ვერ ვიტყვი, ვინ იყო.
გიორგი წითლიძე, შსს-ს წარმომადგენელი, გოგიტა მაღრაძის საქმის მოწმე:
როდესაც დაიწყო ხმოვანი მოწოდებები, ჩვენ ვმოძრაობდით ჭიჭინაძეზე. ამ დროს შევამჩნიეთ გოგიტა მაღრაძე, რომელიც არ დაემორჩილა მოწოდებებს.
მოსამართლე: ვინ დააკავა ის?
შსს-ს წარმომადგენელი გიორგი წითლიძე: გდდ-ს თანამშრომლებმა.
მოსამართლე: რას აკეთებდა ის?
შსს-ს წარმომადგენელი გიორგი წითლიძე: “მონებს” იძახდა, როგორც ხდება ხოლმე აქციებზე.
იოსებ მაღრაძე, დაცვის მხარის მოწმე, გოგიტა მაღრაძის მამა: ვიყავი ჭიჭინაძის ქუჩაზე, აქციაზე, მაინტერესებდა რა ხდებოდა. დავინახე ზემოდან ხალხი ჩამორბოდა. დავინახე წაქცეული ბავშვები. დავიწყე მათი წამოყენება მშვიდად. მომადგა სპეცრაზმი და ხუთმა კაცმა უმოწყალოდ, მუშტებით, სრული გამეტებით დამიწყეს ცემა. ჩემი შვილი იდგა ჩემს წინ. ვეღარ გავუძელი, წავიქეცი, ამასობაში ვუყურებ შვილის ცემასაც, არავის გამოგაცდევინოს, არავის გისურვებთ ამას. ამასობაში ამბობს სპეცრაზმელი, სადღა მიგყავს ეს, სახე აღარ აქვს. იმ ღამეს პოლიციელის დანახვა იყო შვება სპეცრაზმელებთან შედარებით. ამაყენა პოლიციელმა ასფალტიდან, წავედი ჩემი შვილისკენ.
შსს-ს სტატისტიკა დაკავებულების შესახებ - 3 დეკემბრის მონაცემები:
ადმინისტრაციული წესით დაკავებულია 293 პირი.
დაკავებულ პირთაგან თბილისის საქალაქო სასამართლოს უკვე წარედგინა 108 პირის ადმინისტრაციული საქმის მასალები, რომელთაგან საქმისწარმოება დასრულდა 89 პირის მიმართ.
დასრულებული 89 საქმიდან:
- 43 პირის მიმართ გამოყენებული იქნა ჯარიმა
- 41 პირის მიმართ გამოყენებულ იქნა ადმინისტრაციული პატიმრობა, ისინი დროებითი მოთავსების სხვადასხვა იზოლატორში იხდიან აღნიშნულ პატიმრობას.
- 5 პირის მიმართ გამოყენებულ იქნა შენიშვნა.
ფორუმი