მოსამართლე კობა ჩაგუნავას 20 წუთი დასჭირდა გადაწყვეტილების მისაღებად და ხუთივე პირი ცნო სამართალდამრღვევად პოლიციის კანონიერი მოთხოვნის დაუმორჩილებლობის მუხლით.
მათ დაეკისრათ ადმინისტრაციული სახდელი ჯარიმის სახით:
- ზურაბ გუგულაშვილი - 2300 ლარი
- ნოდარ ჯაფარიძე - 2300 ლარი
- საბა ზაკალაშვილი - 2500 ლარი
- ბესიკ ჭუმბურიძე - 2300 ლარი
- გოგიტა მაღრაძე - 2500 ლარი.
მოსამართლის გადაწყვეტილებას ადვოკატები სააპელაციო სასამართლოში გაასაჩივრებენ.
რუსთაველზე ისვრიან ცრემლმდენ ბალონებსა და პიროტექნიკას
ბოლო სამი საათია პოლიცია ჰაერში ცრემლმდენ აირს უშვებს, საპასუხოდ კი აქციის მონაწილეები სადღესასწაულო პიროტექნიკას ესვრიან. პოლიცია რუსთაველის გამზირზე, ჭიჭინაძის ქუჩის შესახვევთან დგას და ზურგს წყლის ჭავლის ავტომობილებით იმაგრებს.
შინაგან საქმეთა სამინისტრომ აქციის დაშლა საზოგადოებრივი ტრანსპორტის გაჩერებამდე რამდენიმე წუთით ადრე, დაახლოებით 23:30 საათზე აქტიურ რეჟიმში დაიწყო - თუმცა ხალხის ნაწილი ჰაერში ცრემლმდენი აირის გაფანტვისთანავე უკან ბრუნდება. რამდენიმე ათასი დემონსტრანტი დგას რუსთაველის თეატრიდან ფოსტის ყოფილ შენობამდე.
მეექვსე დღეა პოლიცია აქციის მონაწილეთა დასაშლელად იყენებს წყლის ჭავლსა და ცრემლმდენ აირს. დემონსტრანტების დაკავების დროს პოლიცია მათზე ძალადობდა. იძალადეს რამდენიმე ათეულ ჟურნალისტებზეც.
შეიქმნა პლატფორმა, რომელშიც ჩანს, პარლამენტთან სად დგას პოლიცია
ინტერნეტში გავრცელდა ახლად შექმნილი პლატფორმის ბმული, რომელზე გამოსახულ რუკაზეც ჩანს, პარლამენტთან სად დგას პოლიცია. მონაცემები ონლაინ რეჟიმში ახლდება.
პლატფორმა ბიზნესისა და ტექნოლოგიები უნივერსიტეტის (BTU) სტუდენტებმა შექმნეს.
ამავე ბმულზე ჩანს, რა წერტილებშია შესაძლებელი პირველადი დახმარების მიღება. „უახლოეს მონაცემებში“ კი ჩნდება ცნობები, რომლითაც აქციის მონაწილეებს აცნობენ მიმდინარე მოვლენების შესახებ ინფორმაციას.
ფორუმი