ფინეთმა დააკავა ნავთობის ტანკერი Eagle S-ი მას შემდეგ, რაც 25 დეკემბერს ბალტიის ზღვაში მოხდა შეფერხება ესტონეთისა და ფინეთის დამაკავშირებელი ელექტროსადენის, Estlink 2-ის, მუშაობაში.
ფინეთის სასაზღვრო სამსახურებმა გემი პორკკალას სანაპირომდე მიაცილეს, იტყობინება Yle. გემის დაკავების შესახებ ინფორმაცია ასევე დაადასტურეს Financial Times-ის წყაროებმა. გაზეთის მონაცემებით, კუკის კუნძულების დროშით მცურავ ტანკერს ნავთობი რუსეთიდან ეგვიპტეში გადაჰქონდა.
გემს უკავშირებენ რუსეთის ე.წ. ჩრდილოვან ფლოტს, რომელიც რუსული ნავთობის ტრანსპორტირებისთვის გამოიყენება საერთაშორისო სანქციების გვერდის ავლით. ტანკერი შემჩნეული იყო იმ რაიონში, სადაც გადის სადენი Estlink2-ი.
საზღვაო მოძრაობის მეთვალყურეობის სამსახურის, Marinetraffic-ის, მონაცემებით, გემმა მნიშვნელოვნად შეამცირა სიჩქარე იმ მომენტში, როცა სადენის მუშაობაში შეფერხება დაფიქსირდა, იტყობინება Yle. Financial Times-ის წყაროები დასძენენ, რომ მიმდინარეობს გამოძიება, რადგან ტანკერი ეჭვმიტანილია სამი სადენის დაზიანებაში ფინეთის ყურეში.
გამოცემა Err-ს მოჰყავს ესტონეთის შინაგან საქმეთა მინისტრის, ლაურა ლიანემეტსის სიტყვები. მინისტრი ამბობს, რომ "სადენების სამი დაზიანება ასეთ მოკლე ვადაში ძნელია აიხსნას, როგორც უბრალო დამთხვევა".
ბოლო თვეებში ბალტიის ზღვაში კაბელებისა და მილსადენების დაზიანების რამდენიმე შემთხვევას ჰქონდა ადგილი. სულ ბოლო ინციდენტი დაკავშირებულია ელექტროსადენ Estlink 2-თან.
ფორუმი