მას ასევე აეკრძალა 2 წლით სახელმწიფო სამსახურში მუშაობის უფლება. სისხლის სამართლის საქმეზე განაჩენი მოსამართლე ზვიად შარაძემ თბილისის საქალაქო სასამართლოში დღეს, 23 ივნისს გამოაცხადა.
მამუკა ხაზარაძე და მისი პარტიის წევრები საქალაქო სასამართლოში გადაწყვეტილების გამოცხადებისას დარბაზში არ ყოფილან. მათ სასამართლო პროცესის პარალელურად პარტიის ოფისში გამართეს ბრიფინგი. ამ ბრიფინგზე მამუკა ხაზარაძემ ოცნების დამფუძნებელს, ბიძინა ივანიშვილს მიმართა.
"მინდა, ძალიან მკაფიოდ ვთქვა ერთი რამ, არ არსებობს ძალა, რომელიც ჩვენს შემართებას, ჩვენს სულისკვეთებას და ჩვენს ბრძოლას ამ ტემპს მოაკლებინებს ან რაღაც კომპრომისზე წაიყვანს. დღეს ჩვენ შეიძლება ვნახოთ სხვადასხვა ტიპის გადაწყვეტილება, ან საპატიმრო, მაგრამ მიუხედავად ნებისმიერი გადაწყვეტილებისა, ძალიან მკაფიოდ ვუგზავნი ამ გზავნილს ბიძინა ივანიშვილს - არ არსებობს ძალა, რომ მე და ჩემს გუნდს შენი შეგვეშინდეს, ეს მე ვთქვი და კიდევ ვიმეორებ. ეს ბრძოლა არის ჩვენი ქვეყნის ხვალინდელი დღისთვის, თავისუფლებისთვის, თავისუფალ სამყაროსთან ინტეგრაციისთვის და არა ისეთ ქვეყნებთან, რომლის ლიდერების პანაშვიდზე ე.წ. პრემიერ-მინისტრს აგზავნიან. ეს არის ბრძოლა, ეს არის ჩვენს შორის განსხვავება. ეს არის ის, რისთვისაც ჩვენ პოლიტიკაში ვართ.
5 წელი დაგვდევდი, რომ 12-წლიანი მუხლი მოგესაჯა. არ დაგვიტოვებია ქვეყანა და გეუბნები, არც ახლა ვაპირებთ ქვეყნის დატოვებას. ბრძოლა გაგრძელდება, ჩვენი გუნდი მზადაა ბრძოლისთვის და ამ ბრძოლას აუცილებლად მივიყვანთ ბოლომდე. ჩემი სოლიდარობა ზურაბ ჯაფარიძეს, ჩვენს მეგობარს, თანამებრძოლს. სადაც არ უნდა ვიყოთ, ჩვენ გავაგრძელებთ ბრძოლას. ამ ქვეყანას აქვს ერთადერთი კარგი მომავალი, რომ ერთხელ და სამუდამოდ, გავათავისუფლოთ ეს ქვეყანა ოკუპაციისგან და ამას ჩვენ აუცილებლად გავაკეთებთ!“ - თქვა ხაზარაძემ პარტიის ოფისში გამართულ ბრიფინგზე. მედიასთან განცხადება გააკეთა ბადრი ჯაფარიძემაც - სასამართლომ მის საქმეზეც დღეს უნდა მიიღოს გადაწყვეტილება.
„ეს არის პოლიტიკურად მოტივირებული საქმე მამუკას და ჩემს წინააღმდეგ. ამოცანაა, რომ გატეხოს ჩვენი წინააღმდეგობა. ხელი ჩავიქნიოთ ჩვენი ქვეყნის მომავლის ბრძოლისთვის - ეს არ მოხდება.
ეს არ არის საგამოძიებო კომისია, ეს არის ერთპარტიული სადამსჯელო მანქანა,რომელიც უსწორდება თავის პოლიტიკურ ოპონენტებს, ეს მთელმა მსოფლიომ იცის. შესაბამისად, ჩვენ უნდა გვესმოდეს, რომ აქ, ბიძინა ივანიშვილის ერთადერთი მიზანი არის, რომ სადამსჯელო მანქანა გამოიყენოს ჩვენს გასაჩუმებლად, ჩვენს გასატეხად, ეს ვერ მოხდება იმიტომ, რომ ჩვენ არ ვუღალატებთ ამ ქვეყნის ინტერესებს, არასდროს ვუღალატებთ თავისუფლებისთვის ბრძოლის იდეალებს. ასე იყო მთელი ჩემი ცხოვრება და ასე გაგრძელდება მუდამ“, - თქვა ბადრი ჯაფარიძემ. გადაწყვეტილება მის საქმეზე 23 ნოემბერს დღის 5 საათზე უნდა გამოცხადდეს.
ხაზარაძის წინააღმდეგ საქმე აღძრული იყო „სისხლის სამართლის კოდექსის“ 349-ე მუხლით, რაც „საქართველოს პარლამენტის დროებითი საგამოძიებო კომისიის მოთხოვნის შეუსრულებლობას“ გულისხმობს. მას ამ საქმეზე 50 000-ლარიანი გირაო ჰქონდა შეფარდებული, რომელიც რამდენიმე ოპოზიციონერი პოლიტიკოსისგან განსხვავებით, გადაიხადა.
მსგავს საქმეზე 7-თვიანი პატიმრობა უკვე მიუსაჯეს ოპოზიციონერ პოლიტიკოსს ზურა ჯაფარიძეს, „კოალიცია ცვლილებისთვის“ ლიდერს, რომელიც უკვე დაპატიმრებული იყო, რადგან არ გადაიხადა გირაო.
„ძლიერი საქართველოს“ ლიდერი „ქართული ოცნების“ შექმნილ დროებით საგამოძიებო კომისიაში კიდევ ერთხელ დაიბარეს - მას 30 ივნისს ელიან.
„გაცნობებთ, რომ კომისიის მიერ მოთხოვნილია თქვენ მიერ ახსნა-განმარტების მიცემა 2012-2025 წლებში საქართველოს საგარეო პოლიტიკური მიზნების საზიანოდ განხორციელებული ქმედებების შესახებ“, - წერია წერილში.
საპასუხოდ მამუკა ხაზარაძემ სოციალურ ქსელში დაწერა:
„მგონი მკაფიოდ გითხარით, რომ არ გაღიარებთ. მოსვლას არ ვაპირებ!.. ვიცი, რომ ჩემი დაჭერა გინდათ. ნუ წვალობთ, მაინც ვერ შემაშინებთ! ბრძოლა რუსულ რეჟიმთან იქნება ბოლომდე!“
„ქართულმა ოცნებამ“ „ნაციონალური მოძრაობის“ ხელისუფლების პერიოდის შესასწავლად საგამოძიებო კომისია 5 თებერვალს შექმნა. კომისიის თავმჯდომარეა ამავე პარტიის ერთ-ერთი ლიდერი თეა წულუკიანია.
„ქართულ ოცნებას“ „კოლექტიური ნაცმოძრაობის“ აკრძალვა სურს. "კოლექტიურ ნაცმოძრაობაში იგი მოიაზრებს დიდ ოპოზიციურ პარტიებს, რომლებმაც 2024 წლის საპარლამენტო არჩევნებზე ბარიერი გადალახეს და რომლებიც არ ცნობენ მოქმედი ხელისუფლების ლეგიტიმაციას.
კომისიის სხდომაზე არ გამოცხადდნენ სხვა ოპოზიციონერი პოლიტიკოსებიც: მისი თანაპარტიელი ბადრი ჯაფარიძე, „კოალიცია ცვლილებისთვის“ ლიდერები ნიკა გვარამია, ნიკა მელია, ზურა ჯაფარიძე და ასევე სხვები. ნიკა მელიას, ნიკა გვარამიასა და ზურა ჯაფარიძის მსგავსად, ამ საქმეზე დაპატიმრებულია ირაკლი ოქრუაშვილიც - მათ გირაო არ გადაიხადეს. მამუკა ხაზარაძემ, ბადრი ჯაფარიძემ და გიორგი ვაშაძემ, „სტრატეგია აღმაშენებლის“ ლიდერმა გირაო გადაიხადეს.
გიორგი გახარია იმ გამონაკლის ოპოზიციონერებს შორისაა, რომლებიც კომისიის სხდომაზე მივიდნენ. თუმცა 16 ივნისს, ის კიდევ ერთხელ დაიბარეს კომისიაზე.
ფორუმი