26 წლის დავით ხომერიკი სასამართლო დარბაზში ორ ბადრაგს შემოჰყავს. ლურჯი სვიტერი და ხაკისფერი ჟილეტი აცვია. ფეხზე დგას, არ ჯდება იქამდე, სანამ მოსამართლე არ მიუთითებს, იღიმის...
„დაკავებამდე გრძელი კულულები ჰქონდა“, - ამბობს დედა, დედიკა მაისურაძე.
პროკურატურა ამტკიცებს, რომ ის აფეთქებას ამზადებდა, რისთვისაც ოთხიდან შვიდ წლამდე პატიმრობა ემუქრება.
გამოძიება სისხლის სამართლის კოდექსის მე-18-229-ე მუხლებით მიდის, რაც გულისხმობს დანაშაულის მომზადებას, ამ შემთხვევაში „ასაფეთქებელი ან სიცოცხლისა და ჯანმრთელობისათვის საშიში სხვა მოწყობილობის ან ნივთიერების გადატანა, განთავსებას“.
2024 წლის 28 ნოემბრის შემდეგ დაკავებული დემონსტრანტებიდან ის ერთადერთია, რომელსაც ამ მუხლით ასამართლებენ.
და მაინც, რას აფეთქებდა ხომერიკი?
ამ კითხვაზე პასუხი პროკურორ ლაშა თოდუას არ გაუცია. მან საქმის არსებითი განხილვის პირველ სხდომაზე თქვა: „დავითმა გადაწყვიტა დაემზადებინა სიცოცხლისთვის და ჯანმრთელობისთვის საშიში მოლოტოვის კოქტეილები, მოიძია ინფორმაცია, როგორ მზადდება და დაამზადა კიდეც“.
დავით ხომერიკის ადვოკატებისთვის გაუგებარია, რას ეყრდნობა პროკურატურა, როცა ამტკიცებს, რომ ბრალდებულმა „მოლოტოვის კოქტეილის“ დამზადებაზე ინფორმაცია წინასწარ მოიძია.
„ამ ეტაპზე ამის დამადასტურებელი მტკიცებულება პროკურატურას არ წარმოუდგენია, სამომავლოდ რას მოიტანს პროცესზე, ეს ჩვენთვის უცნობია“, - თქვა შოთა თუთბერიძემ.
საქმის მასალების მიხედვით, დავით ხომერიკს ზურგჩანთაში უპოვეს შუშის „რამდენიმე ბოთლი“, რომელშიც „აალებადი ნივთიერება - სახეშეცვლილი დიზელი“ ესხა.
„ბოთლებზე შემოხვეული იყო ნაჭრის ფითილი, რომელზეც დასხმული იყო აალებადი ნივთიერება, ექსპერტმა დაადგინა, რომ ეს ცეცხლგამჩენი მოწყობილობა იყო“, - დააზუსტა პროკურორმა რადიო თავისუფლებისთვის.
„ექსპერტიზა არ ამბობს, რომ ეს იყო ცეცხლგამჩენი ნივთიერება, ის ამბობს, რომ ბოთლში არსებული ნივთიერება აალებადი იყო“, - სხვანაირად კითხულობს დასკვნას დაკავებულის ადვოკატი შოთა თუთბერიძე.
ცეცხლგამჩენია ნივთიერება, რომელსაც, მაგალითად, სროლის შემთხვევაში შეუძლია ცეცხლი წაუკიდოს სამიზნეს. აალებად ნივთიერებას კი ბუნებრივადაც შეიძლება გაუჩნდეს ცეცხლი, მაგალითად, ტემპერატურული ზემოქმედებით.
ანუ, ადვოკატი ასე მსჯელობს: თუ აალებადი ნივთიერების გადატანა დანაშაულად ჩაითვლება, შეუძლიათ აფეთქების მომზადებაში დასდონ ბრალი ნებისმიერ ადამიანს, ვისაც აქვს საწვავის ავზი ან სახლში ინახავს ნავთობპროდუქტებს.
მნიშვნელოვანი დეტალია ისიც, რომ მუსიკოსს საშიში ნივთიერების გადატანას კი არ ედავებიან, არამედ აფეთქების მომზადებას.
„ჩვენი აზრით, მას აფეთქების მომზადების მუხლი, გადატანის ნაცვლად, იმიტომ წარუდგინეს, რომ არ სურდათ ჩვენ ნაფიც მსაჯულთა სასამართლოს უფლებით გვესარგებლა. გამოძიება რომ ფეთქებადი ნივთიერების გადატანის მუხლით დაწყებულიყო, ჩვენ ნაფიც მსაჯულებს გამოვიძახებდით“, - ამბობს შოთა თუთბერიძე.
დაკავებულის ადვოკატები ფიქრობენ, რომ როცა საქმე დემონსტრანტებს ეხებათ, მოსამართლეები პოლიტიკურად მოტივირებულ გადაწყვეტილებას იღებენ, ნაფიც მსაჯულთა სასამართლო კი ე.წ. კლანისა და ხელისუფლების გავლენისგან თავისუფალი ინსტიტუტია.
ხომერიკი გლდანის ციხეში, საკანში ჯგუფურ ძალადობაში მონაწილეობის მუხლით დაკავებულ ანდრო ჭიჭინაძესთან ერთად ზის.
„წიგნებს კითხულობს, ხატავს, წერს. ჭადრაკი ასწავლა ანდრო ჭიჭინაძეს, ცივა და გარეთ ვერ გავდივარო, მაპატიეო - ასე მამშვიდებს“, - ამბობს დედა.
დავით ხომერიკსა და მის ოჯახის წევრებს ერთმანეთთან ხშირი მიმოწერა აქვთ. საპატიმროდან ყველაზე ბევრს დედას და ბებიას სწერს. სულ ბოლო წერილი 23 თებერვლით თარიღდება.
„როგორ ხარ დეე? შენი წერილი მივიღე და ძალიან გამიხარდა, ცოტა ემოციური კი იყო პირველი წაკითხვისთვის, მაგრამ ახლა ყოველთვის როცა ვკითხულობ თითოეული სიტყვა მაძლიერებს…
... ჯანმრთელობას მიხედეო რომ მეუბნები, მეც ანალოგიური მინდა შენგან, ვცდილობ, როგორც შემიძლია ისე აგისრულო ეგ თხოვნა. ახლა ცოტა ცივა დილაობით და აივანზე გაყინვას არ ვაპირებ, ამიტომ ცოტა გამოიდაროს და მერე ავალ ხოლმე ბიჭებთან ერთად. ერთი ფანჯარა სულ გამოღებული გვაქვს ხოლმე და ასე თუ ისე ჰაერი მაინც შემოდის, ოთახში გამწოვიც არის და ცენტრალური გათბობა, აქ უფრო ვუვლი თავს, ვიდრე გარეთ. ყველაფერი კარგად არის, როცა მინდა ვდგები, როცა მინდა ვწვები. ხან სიწყნარეა, ხანაც მხიარულება. დილა ყავით და შოკოლადით იწყება, მაცივარიც სულ გამოტენილი გვაქვს ხოლმე საჭმელებით. ყველანი ერთად ვართ და ერთად ვცხოვრობთ და დროც ასე უფრო მალე გადის.
დეე გთხოვ თავს ძალიან ნუ გადაიტვირთავ და საკუთარ თავზე და ჯანმრთელობაზე იზრუნე, ჩემზე დარდით გულს ნუ გადაიღლი, მიყვარხარ ძალიან. ჩვენ ყველანი, შენი შვილები, შენი მგლის ლეკვები ვართ. ყველაფერი კარგად იქნება და ერთ დღესაც გამოიდარებს“, - წერს ხომერიკი.
დაკავებული ბრალს არ აღიარებს და ამბობს, რომ ე.წ. მოლოტოვის კოქტეილი არც ჩანთაში შეუნახავს და არც უტარებია. დაკავებულის ადვოკატები მტკიცებულებების ავთენტიკურობას ეჭვქვეშ აყენებენ, რის საფუძველსაც მათთვის საქმის მასალების გარდა ხომერიკის დაკავების გარემოებაც იძლევა.
დავით ხომერიკი 2 დეკემბერს თამარაშვილის გამზირზე გამთენიისას დააკავეს. პოლიცია ამბობს, რომ გზას კეტავდაო.
„გამოდის, რომ იმ დროს, როცა ხომერიკი ეჭიდავებოდა პოლიციელებს, ზურგჩანთაში ჰქონდა ასაფეთქებელი მოწყობილობა? საკმაოდ ჭკვიანი ბიჭია, ასე სულელურად არ მოიქცეოდა”, - ამბობს მისი ადვოკატი, შოთა თუთბერიძე.
დაკავება
დავით ხომერიკი, თავის ძმასთან ზუკა ხომერიკთან ერთად, ორ დეკემბერს თამარაშვილის ქუჩაზე დილის ცხრა საათისთვის დააკავეს.
პოლიცია ამბობს, გზას ხელოვნურად კეტავდნენ და ჩვენს მოთხოვნას არ დაემორჩილნენო. ზუკა ხომერიკის პროცესი დაკავებიდან მალევე გაიმართა, ის სამართალდამრღვევად ცნეს და სიტყვიერი შენიშვნა გამოუცხადეს. დავითის ბრალეულობაზე პოლიციას ჯერ არ უმსჯელია.
გამოძიების მასალების თანახმად, ადმინისტრაციული წესით დაკავების შემდეგ დავითი და მისი ძმა გაჩხრიკეს და სწორედ მაშინ იპოვეს დავითის ზურგჩანთაში „მოლოტოვის კოქტეილები“.
„რამდენიმე ბოთლი იყო, აქედან სამში იყო ცეცხლგამჩენი მოწყობილობა“, - ამბობს პროკურორი.
ამის შემდეგ საქმეში კრიმინალური პოლიცია ჩაერთო. 2 დეკემბერს, ვაკეში ჭავჭავაძის გამზირზე ძმები ხომერიკები აქციის მონაწილეებთან ერთად მას შემდეგ აღმოჩნდნენ, რაც პოლიციამ რუსთაველზე დემონსტრანტების დარბევა დაიწყო და მათ ქუჩებში დაედევნა. რამდენიმე ადამიანს სცემეს და დააკავეს მეტრო „რუსთაველის“ ვესტიბიულშიც.
აქციის მონაწილეები კორპუსების სადარბაზოებსა და ეზოებში შერბოდნენ, თუმცა ეს არ იყო უსაფრთხო ადგილი - ნიღბიანი ძალოვნები მათ სადარბაზოებსაც ამოწმებდნენ.
დაკავებამდე მათ ჭავჭავაძის გამზირზე ბარიკადები აღმართეს პოლიციის შესაჩერებლად - დაპირისპირების გამო დაახლოებით ერთი საათის განმავლობაში შეფერხებული იყო მოძრაობა ამ ქუჩაზე. კადრებში, რომლებიც თვითმხილველებმა გადაიღეს, ჩანს პოლიციის ათობით ავტომობილი ვაკე-საბურთალოს გზაზე და იქიდან გადმოსული ნიღბიანი პოლიციელებიც, რომლებიც ავტომობილების ხერგილში მისდევენ ახალგაზრდებს.
ადვოკატი ამბობს, რომ დაკავებიდან განყოფილებამდე, გზად - მარშრუტკაში დავით ხომერიკს სცემეს. საქმეს სპეციალური საგამოძიებო სამსახური იძიებს.
„ეს ყველაფერი მოხდა იმიტომ, რომ ესენი იყვნენ აქციაზე, თორემ არანაირი მტკიცებულება დანაშაულის არ აქვთ. დათოს ჰქონდა ჩანთა, ჩანთაში ასანთიც არ ჰქონდა, რომ ასაფეთქებელი მოწყობილობები გამოეყენებინა“, - ამბობს დავით ხომერიკის დედა, დედიკა მაისურაძე.
„აქციაზე ყოფნა არაფერს ცვლის… მას უკვე ჰქონდა ცეცხლგამჩენი მოწყობილობა, რომლის გამოყენების შემთხვევაშიც ჯანმრთელობის მძიმე ან სხვა დაზიანება შეიძლება გამოეწვია“, - პასუხობს პროკურორი ვაჟა თოდუა დავით ხომერიკის ოჯახის წევრებს. ის ამტკიცებს, რომ არა მხოლოდ სროლა და გამოყენება, ნივთიერების გადატანა-განთავსებაც აფეთქების მომზადებაა.
„სექსუალური ძალადობით დაემუქრნენ“
პროკურატურა ბრალდების სასარგებლოდ ხაზს უსვამს იმას, რომ დაკავებულმა ჩხრეკის ოქმს ხელი მოაწერა და ამით დაადასტურა, რომ ე.წ. მოლოტოვის კოქტეილი მან დაამზადა. დავით ხომერიკის ადვოკატი, შოთა თუთბერიძე კი ამბობს, რომ მას ჩხრეკის ოქმზე ხელი ზეწოლით მოაწერინეს.
„განყოფილებაში დავითი გახდა როგორც ფიზიკური, ასევე ფსიქოლოგიური ძალადობის მსხვერპლი, დაწყებული დაჭერის მუქარით და დამთავრებული სექსუალური ძალადობის მუქარით“.
ხელკეტი მიადეს უკანა ტანზე და სექსუალური ძალადობით დაემუქრნენ.შოთა თუთბერიძე, ადვოკატი
დაკავებულის დედის მონათხრობით, ის ძმაზე ძალადობის მუქარითაც შეაშინეს: „უთხრეს - ხომ იცი, შენი ძმა აქ არის, იმას რას ვუზამთო? ამიტომ რაღაცებზე ხელი უნდა მოაწეროო“.
ოჯახი ბოთლზე დატოვებულ დნმ-ის ანალიზის პასუხს ელოდება, რომელიც, ადვოკატის თქმით, ზოგადად უტყუარია, თუმცა მისი გადატანა რაიმე ნივთზე ყველაზე მარტივია.
„პოლიციას ჩხრეკის პროცესი ვიდეოზე არ გადაუღია, რაც ე.წ. ჩადებასთან დაკავშირებით ვარაუდებს ამყარებს“, - ამბობს თუთბერიძე.
ვინ არის დავით ხომერიკი?
დავით ხომერიკი სასულიერო პირის ოჯახში დაიბადა და გაიზარდა. მამამისი დეკანოზია. ჰყავს ერთი ძმა და ერთი და.
საქმის არსებითი განხილვის პირველ სხდომაზე, 5 თებერვალს მან სიტყვით გამოსვლა ძველი აღთქმიდან ციტატით დაიწყო:
„უფლის მოსავნი განიახლებენ ძალას, არწივივით გაშლიან ფრთებს, გაიქცევიან და არ დაიღლებიან, ივლიან და არ დაიქანცებიან“ და ეს მართლაც ასეა, ჩვენ არ გვეშინია და არ დავიღლებით, და ერთი კითხვა მიჩნდება - თუ ღმერთი ჩვენს მხარეს არის, მაშინ ვინღა მოდის ჩვენს წინააღმდეგ?“
დედის თქმით, დავითი 15 წლიდან დამოუკიდებლად ცხოვრებას ცდილობს, ოჯახს სოციალურად დაუცველის სტატუსი აქვს.
„თავადაც ქუჩაში იდგა, ქუდი ედო წინ და მღეროდა, ასე აგროვებდა ფულს. სასულიერო პირების ოჯახი კი ვართ, მაგრამ ძალიან გვიჭირს. არ გვქონდა შესაფერისი საცხოვრებელი ფართი, ქირით წავიდა და შემდეგ ქუჩაში ასე შოულობდა ფულს, რომ ქირა გადაეხადა და ეკვება, გადარჩენილიყო
ეს ყველაფერი მრევლმა იცის, ხალხმა იცის, მეგობრებმა იციან - მე მაინც ხალხის იმედად ვარ, რომ ხალხი დადგება ჩვენს მხარეს“, - უყვება რადიო თავისუფლებას ბრალდებულის დედა და ამატებს, ყველგან აქვს ნამუშევარი, იყო ბარმენი, მენეჯერი, გიდი - ლაშქრობებს აწყობდაო.
დავითს მუსიკალური შვიდწლედი აქვს დამთავრებული. ფორტეპიანოსა და აკუსტიკურ გიტარაზე უკრავს, წერს სიმღერებს, ხატავს. ტექნიკურ უნივერსიტეტში გრაფიკულ დიზაინს სწავლობდა, თუმცა სწავლის საფასური ვეღარ გადაიხადა და შეჩერება მოუხდა.
დავით ხომერიკი როკჯგუფ The sinners-ის ვოკალისტი იყო. დაკავებამდე ბარი გახსნა, რომელიც ახლა დაკეტილია.
„ხალხს ცოცხლად მარხავენ, ამის მერე რაზეა ლაპარაკი, რომელ ჰუმანურ ქვეყანაზეა ლაპარაკი, ბავშვს უნდოდა მუშაობა, ძლივს რაღაც გახსნა, დაიჭირეს, განადგურებენ, მიწასთან გასწორებენ, რომ არ აღმოცენდე, არ განვითარდე, მაშინ რაღა ხარ? ადამიანი ხარ?“, - ამბობს ხომერიკის დედა.
დავით ხომერიკი აქციებზე ხშირად დადიოდა, პოლიციის ძალადობის მომატების საპასუხოდ. „გავრილოვის ღამეს“ პოლიციელის ნასროლი რეზინის ტყვიით მის კლასელს დავით ქურდოვანიძეს თვალი დაუზიანეს, მეგობარმა მაკო გომურმა კი მარჯვენა თვალი სრულად დაკარგა.
„მე ვეუბნებოდი, დედა, ეს პოლიტიკური ამბებია და არ გინდა, არ ჩაერთო, მაგრამ თავისუფალი ახალგაზრდა ადამიანია და გული სხვანაირად უძგერდა... ხმამაღლა არ ვამბობდი არასდროს, მაგრამ მის შეხედულებებს ყოველთვის ვიზიარებდი“, - გვიყვება დედიკა მაისურაძე.
დავით ხომერიკის საქმეს მოსამართლე ნინო გალუსტაშვილი განიხილავს. ის ახალბედა მოსამართლეა. სამწლიანი გამოსაცდელი ვადით, დეკემბრის ბოლოს გაამწესეს.
საქალაქო სასამართლოს გვერდზე გამოქვეყნებულ ბიოგრაფიულ ცნობებში წერია, რომ მოსამართლე ნინო გალუსტაშვილი 33 წლისაა. ის აქციებზე დაკავებული დემონსტრანტებიდან ოთხის საქმეს განიხილავს: მათე დევიძის, გიორგი მინდაძის, დავით ლომიძისა და თემურ ზასოხაშვილის.
ნინო გალუსტაშვილმა 2014 წელს დაამთავრა თბილისის ჰუმანიტარული სასწავლო უნივერსიტეტის სამართალმცოდნეობის ფაკულტეტი, 2017 წელს კი - საქართველოს დავით აღმაშენებლის სახელობის უნივერსიტეტის სამართალმცოდნეობის ფაკულტეტის მაგისტრატურა.
მოსამართლის საკვალიფიკაციო გამოცდა სისხლის სამართლის მიმართულებით 2023 წელს ჩააბარა. 2024 წლამდე იუსტიციის უმაღლესი სკოლის მსმენელი იყო.
დავით ხომერიკის სასამართლო პროცესზე დაიკითხებიან მისი დამკავებელი პოლიციელები, გამომძიებლები და ექსპერტი.
შემდეგი პროცესი 17 მარტს ჩაინიშნა. საქმის განხილვის დრო თვეობით იწელება ხოლმე. პროკურორს ერთ პროცესზე მხოლოდ ერთი მოწმე მოჰყავს.
„აქედან ყველაზე კარგად ჩანს, თუ რა არის ნამდვილი თავისუფლების ფასი, მოკლედ რომ აღვწერო, ეს არის სიცოცხლის შეუფასებელი სიმდიდრე, ეს მშვენიერებაა.
გუშინ ვაჟა პაპას წიგნი მივიღე და წიგნის სათაურიც „სიცოცხლე მშვენიერების ძიებაში”, ალბათ ისიც ამას გულისხმობდა ამ სიტყვებში და მას პირობა მივეცი, რომ ამ მშვენიერებას აუცილებლად მივაღწევ და არასდროს დავნებდები მისთვის ბრძოლაში. ხოლო ყველაფრის თავი და თავი მაინც სიყვარული გამოდის.
ვერასდროს ვერ წარმოვიდგენდი, რომ აქ მოვხვდებოდი, ცხოვრება ხომ ასეთია, მაგრამ როგორც პაპა იტყოდა - ესეც გაივლის!“, - წერს დავით ხომერიკი ოჯახის წევრებსა და მხარდამჭერებს.
ასევე ნახეთ:
- „როცა სიმართლე შენს მხარესაა, მაშინ გეძლევა ძალა“ - ანდრო ჭიჭინაძის საქმე
- ანრი, მათე, საბა, ანატოლი და სხვები - რას ედავებიან პოლიციელებზე თავდასხმაში ბრალდებულებს?
- 20 წელი ან უვადო - რა ვიცით ნარკოდანაშაულისთვის დაკავებულ დემონსტრანტებზე
- სათვალთვალო კამერების დაზიანების გამო დაკავებულებს 6 წლამდე პატიმრობა ემუქრებათ - რა ვიცით მათზე?
- მოღიმარი ბიჭი ფოტოდან - ირაკლი მიმინოშვილის საქმე
- „ბინ ლადენსაც შეშურდებოდა მისი ბრალდება“ - 19 წლის აქტივისტის, ზვიად ცეცხლაძის ციხეში მოხვედრის ამბავი
- „პატიმარი კი არა, ტყვე ვარ“ - ძალადობის ორგანიზების საქმეზე დაკავებული ვეფხია კასრაძის ამბავი
- "ძალადობა" მათთან ერთად, ვისაც არასდროს შეხვედრიხარ - მძიმე ბრალდებები და არაადამიანური მოპყრობა რევაზ კიკნაძის საქმეში.
- ჯგუფური ძალადობისთვის დაკავებულები - ვის და რას ედავებიან
