ცერემონიალის რამდენიმესაათიანი საჯარო ნაწილის შემდეგ, პაპ ფრანცისკეს ცხედარი ვატიკანის წმინდა პეტრეს მოედნიდან გადაასვენეს - დაკრძალვის ცერემონიალს რომის სანტა მარია მაჯორეს ბაზილიკაში უმაღლესი რანგის კარდინალები და პაპთან დაახლოებული პირები დაესწრნენ.
ოფიციალური ვატიკანის მიერ გავრცელებულ ვიდეოში ჩანს, რომ კარდინალი კევინ ფარელი, - რომელიც ამჟამად, ახალი პაპის არჩევამდე მართავს ვატიკანს, - დალოცვის რიტუალს ასრულებს, სანამ ფრანცისკეს ცხედარს განსასვენებელს მიაბარებენ.
ცერემონიალზე დასასწრებად ჩავიდნენ მსოფლიოს ქვეყნების ლიდერები - აშშ-ის პრეზიდენტი დონალდ ტრამპი, ბრიტანეთის პრემიერ-მინისტრი კირ სტარმერი, საფრანგეთის პრეზიდენტი ემანუელ მაკრონი, ბრაზილიის პრეზიდენტი ლულა და სილვა, არგენტინის პრეზიდენტი ხავიერ მილეი და სხვები.
საქართველოდან იქ იმყოფებოდა მიხეილ ყაველაშვილი.
პაპის დაკრძალვის ცერემონიალს პოლიტიკური განზომილებაც ჰქონდა: უკრაინისა და შეერთებული შტატების პრეზიდენტები, ვოლოდიმირ ზელენსკი და დონალდ ტრამპი პაპ ფრანცისკეს დაკრძალვისას ვატიკანში შეხვდნენ ერთმანეთს. ეს მათი პირველი შეხვედრა იყო თეთრ სახლში კამათის შემდეგ.
ვატიკანში წყაროებზე დაყრდნობით Sky News-ი იუწყებოდა, რომ ორი ლიდერი შეთანხმდა მოლაპარაკებების გაგრძელებაზე დაკრძალვის შემდეგ. თუმცა მოგვიანებით ზელენსკის ადმინისტრაციამ განაცხადა, რომ მეორე შეხვედრა არ შედგება ორივე ლიდერის დღის წესრიგის გადატვირთულობის გამო.
2025 წლის 18 თებერვალს პაპ ფრანცისკეს ორმაგი პნევმონიის დიაგნოზი დაუსვეს. ის 21 აპრილს გარდაიცვალა - 88 წლის ასაკში.
საერთაშორისო მედია უკვე ასახელებს პაპობის სავარაუდო კანდიდატებს.
გარდაცვლილი ფრანცისკეს პოტენციურ მემკვიდრედ მიიჩნევა ოცამდე კარდინალი, რომლებიც მონაწილეობას მიიღებენ კონკლავში.
ახალი პაპი უნდა აირჩიოს კათოლიკური ეკლესიის უმაღლესი რანგის იერარქების ერთობამ, კარდინალთა კოლეგიამ, რომლის წევრებსაც ნიშნავს თავად პაპი და რომლებიც, როგორც წესი, ხელდასხმული ეპისკოპოსები არიან. ამასთან, ყველა კარდინალი მამაკაცია.
ახალი პაპისათვის ხმის მიცემა შეუძლიათ მხოლოდ „პაპაბილებს“ ანუ მათ, ვისაც ჯერ არ შესრულებია 80 წელი. ამჟამად კოლეგიაში შედის 252 კათოლიკე კარდინალი, რომელთაგან ხმის მიცემის უფლება აქვს 195-ს. დანარჩენებს შეუძლიათ მონაწილეობა მიიღონ დებატებში, თუ ვინ უნდა დაიკავოს ახალი პონტიფექსის ადგილი.
ფორუმი