უკრაინის დედაქალაქ კიევის გარდა, სადაც წინასწარი მონაცემებით, 4 ადამიანი დაიღუპა, რუსეთის ჯარებმა გასულ ღამით რაკეტებით და დრონებით შეუტიეს უკრაინის დასავლეთში და ჩრდილო-დასავლეთში მდებარე ქალაქებსაც.
ტერნოპოლის ოლქის ადმინისტრაციულ ცენტრში, ქალაქ ტერნოპოლში 5 ადამიანი დაშავდა. საოლქო-სამხედრო ადმინისტრაციის ხელმძღვანელის, ვიაჩესლავ ნეგოდას ინფორმაციით, „კალიბრის“ ტიპის ფრთოსანი რაკეტებით და „შაჰედის“ ტიპის დრონებით შეტევის შედეგად ტერნოპოლში დაზიანებულია საწარმოები. კონკრეტულად რომელი, ნეგოდას არ დაუსახელებია.
15 დრონით და 6 რაკეტით შეტევის შესახებ იუწყება ვოლინის ოლქის ადმინისტრაციული ცენტრის, ქალაქ ლუცკის მერი იგორ პოლიშჩუკი. მისი ინფორმაციით, დაშავდა 5 ადამიანი. დანგრეულია მრავალბინიანი სახლის ზედა სართულები და დაზიანებულია კიდევ რამდენიმე სახლი.
რუსული რაკტებით და დრონებით შეტევა იყო ლვოვის ოლქზეც. ადგილობრივი ხელისუფლების ინფორმაციით, დაზიანებულია სამრეწველო ობიექტი და ელექტროგადამცემი ხაზები.
განახლება: უკრაინის საგანგებო სიტუაციების სამსახურის მიერ დაზუსტებული მონაცემებით, ქალაქ ლუცკში 15 ადამიანი დაშავდა. 5-დან 10-მდე გაიზარდა ტერნოპოლში დაშავებულთა რიცხვიც.
6 ივნისს, შუაღამის შემდეგ რუსეთის ჯარებმა რაკეტებით და დრონებით შეუტიეს უკრაინის დედაქალაქ კიევსაც. მერის, ვიტალი კლიჩკოს ინფორმაციით, დილის რვის ნახევრისთვის დადასტურებული იყო 4 ადამიანის სიკვდილი. 20 დაშავდა.
ადგილობრივი ხელისუფლების ცნობით, კიევში ხანძრები გაჩნდა საცხოვრებელ და არასაცხოვრებელ ზონებში. დაზიანდა მეტროს ორ სადგურს შორის არსებული ლიანდაგი. კიევის ნაწილს ელექტროენერგიის მიწოდება შეუწყდა.
უკრაინის რკინიგზის ინფორმაციით, კიევის ოლქში დაზიანებულია რკინიგზის ლიანდაგები და მატარებლები სარეზერვო მარშრუტებით იმოძრავებენ.
განახლება: უკრაინის საჰაერო ძალების სარდლობის მიერ 6 ივნისს, დღის 12 საათისთვის გამოქვეყნებული ინფორმაციით, რომელიც სხვა წყაროებით გადაუმოწმებელია, ღამის განმავლობაში რუსეთის ჯარებმა უკრაინას შეუტიეს 407 უპილოტო საფრენი აპარატით და 45 რაკეტით. სარდლობის თანახმად, მოგერებულია 199 დრონი და 36 რაკეტა.
ფორუმი