სხდომა განახლდა. აღკვეთის ღონისძიების შეცვლის შუამდგომლობას აყენებს ადვოკატი, ომარ ფურცელაძე. ის ამბობს, რომ ბრალდების მხარის მტკიცებულებები უკვე სრულადაა გამოკვლეული და მნიშვნელოვანია ინფორმაცია, რომელიც მიიღეს ბრალდების მოწმეებისგან.
ის მოიხმობს მთავარი გამომძიებლის, არსენ ხუნაშვილს ჩვენებას და ამბობს, რომ მისმა ჩვენებამ აჩვენა - საქმეში არ არის მტკიცებულება, რომელიც დაადასტურებს ორგანიზებულობას და სავარაუდო ორგანიზატორებთან კავშირს.
ამას გარდა, ომარ ფურცელაძის თქმით, ახალი გარემობაა დღეს მის მიერ წარდგენილი ექსპერტიზის დასკვნები, რომელმაც აჩვენა, რომ სულ რომ გური მირცხულავას გაესროლა ნივთი ის არ ყოფილა პოლიციის მისამართით ნასროლი. ამასთან დადასტურდა, რომ საგნის რაობის და სიმძიმის განსაზღვრა ვიდეოთი შეუძლებელია.
„ვინაიდან უკვე დასრულებულია მტკიცებულებებბის გამოკვლევა, მასზე ზემოქმედების რისკი აღარ არსებობს", - აცხადებს ადვოკატი და აგრძელებს შუამდგომლობის დასაბუთებას. ის ამატებს, რომ განმეორებითი დანაშაულის ჩადების საფრთხეც არ არსებობს, რადგან მოცემულ შემთხვევაშიც მისმა დაცვის ქვეშ მყოფებმა მხოლოდ ერთხელ ისროლეს რაღაც საგანი.
ადვოკატი ომარ ფურცელაძე მოსამართლე, ნინო გალუსტაშვილს მოუწოდებს შეცვალოს ჯანო არჩაიას და გური მირცხულავას აღკვეთის ღონისძიება გირაოთი და სხვა დამატებითი ღონისძიებებით.
ომარ ფურცელაძის შუამდგომლობას ეთანხმება ადვოკატი ბექა ხოხობაშვილი. ის ამ საქმეში სერგეი კუხარჩუკისა და რუსლან სივაკოვის ადვოკატია.
ბექა ხოხობაშვილის თქმით, ის იცავს უკრაინის მოქალაქეებს და მათ ოჯახის წევრებთან კომუნიკაციის საშუალება არ აქვთ. სერგეი კუხარჩუკი ამ მოთხოვნით შიმშილობდა და ადვოკატის თქმით, სახალხო დამცველმა, რომელიც შევიდა ციხეში, დაარწმუნა ის, რომ აღარ ეშიმშილა.
ადვოკატის თქმით, კუხარჩუკის ერთ-ერთი მოთხოვნა სხდომებზე მედიის დასწრებაც იყო.
აწყვეტინებს მოსამართლე საუბარს იმ დროს, როცა ხოხობაშვილის თარჯიმნის პრობლემას იხსენებს. ნინო გალუსტაშვილის თქმით, ახლა აღკვეთის ღონისძიებას განიხილავენ.
„როცა ადგილზე თათბირობთ არ იღებთ ობიექტურ გადაწყვეტილებას, თარჯიმანზე მიიღეთ გადაწყვეტილება, როცა სხდომიდან გახვედით. უკეთესი იქნება თქვენ ადგილზე თათბირით არ მიიღოთ ხოლმე გადაწყვეტილება, ადგილზე ვერ იღებთ ხოლმე რატომღაც, გადით სათათბიროდ დღესაც მოგიწოდებთ. ამ ადამიანების პატიმრობა არის უკანონო", - ამბობს ადვოკატი.
აჩერებს მოსამართლე, მოვისმინე თქვენი პოზიცია და სხვა ადვოკატებმა განაგრძეთო.
ადვოკატი აპროტესტებს, რომ მოსამართლე სიტყვას არ ასრულებინებს. „რაიმე ლიმიტი მაქვს სიტყვებზეო?", - კითხულობს ბექა ხოხობაშვილი და ამატებს: „ისეთი სიტუაცია იქმნება, რომ თქვენ მხარე ხართ".
„დავასრულოთ საუბარი“, - ამბობს მოსამართლე, ნინო გალუსტაშვილი.
„ვსაუბრობ", - ეუბნება ხოხობაშვილი.
„არ დაგისრულებიათ შუამდგომლობა?", - კითხულობს გალუსტაშვილი, ხოხობაშვილი აგრძელებს საერთაშორისო პრაქტიკიდან მაგალითების კითხვას.
ფორუმი