შსს: კაბალში „კრიმინალური ავტორიტეტის“ დაკვეთით მკვლელობა იგეგმებოდა

„[დაკავებულს] ელმურაზ მამედოვის შეკვეთითა და დავალებით უნდა მოეკლა ლაგოდეხის მუნიციპალიტეტის სოფელ კაბალში მცხოვრები ერთ-ერთი პირი, იმ მოტივით, რომ ამ უკანასკნელმა ელმურაზ მამედოვს უარი განუცხადა დაშინებით მოთხოვნილი ფულადი თანხის – 200 000 ამერიკული დოლარის - გადახდაზე“, - განაცხადა „ქართული ოცნების“ მთავრობის შინაგან საქმეთა მინისტრის მოადგილემ, ალექსანდრე დარახველიძემ.

დაკავებულს პოლიცია ედავება შეკვეთილი მკვლელობის მომზადებასა და საბრძოლო მასალის უკანონო შეძენა-შენახვა-ტარებას. საქმე აღძრულია სისხლის სამართლის კოდექსის 18-109-ე და 236-ე მუხლებით. მას 16-დან 20 წლამდე ან უვადო პატიმრობა ემუქრება.

ელმურაზ მამედოვს, რომელსაც შსს „კრიმინალურ ავტორიტეტად“ მოიხსენიებს, რამდენიმე ბრალი აქვს დაუსწრებლად წაყენებული - „მათ შორის მიმდინარე წლის ზაფხულში ლაგოდეხის მუნიციპალიტეტში ჩადენილი შეკვეთილი მკვლელობისათვის.“

მამედოვი საზღვარგარეთ ცხოვრობს და ე.წ. წითელი ცირკულარით ეძებენ.