ხელისუფლება საყოველთაო ჯანდაცვისა და დაზღვევის სისტემის რეფორმირების მეორე ტალღას იწყებს. მიუხედავად იმისა, რომ ჯერჯერობით დაწერილი პროგრამა ფართო საზოგადოებისთვის ცნობილი არ გამხდარა, ხელისუფლების წარმომადგენელთა ზეპირი განცხადებებიდან ვიგებთ, რომ იგეგმება სისტემის გარდაქმნა „სოციალურად უფრო სამართლიანად“, რაც იმას გულისხობს, რომ საყოველთაო ჯანდაცვისა და დაზღვევის პროგრამით ვეღარ ისარგებლებენ პირები, რომლებიც კერძო სადაზღვევო პოლისით სარგებლობენ. იმაზე, თუ რამდენად ეფექტურს გახდის სისტემას ამგვარი მიდგომა ფინანსური თვალსაზრისით, რადიო თავისუფლების სადისკუსიო მაგიდასთან საუბრობენ გიორგი გიგოლაშვილი, საქართველოს სადაზღვევო ინსტიტუტის ხელმძღვანელი, და თენგიზ ვერულავა, მედიცინის აკადემიური დოქტორი. მათთან საუბარს ნინო ხარაძე უძღვება.
