ბოლო დღეებში განსაკუთრებული სიმწვავით წარმოჩინდა ის, რომ სასამართლო სისტემაში სერიოზული პრობლემები და დაპირისპირებაა. სასამართლო სისტემის გაჯანსაღებისა და იუსტიციის საბჭოს რეფორმირების საჭიროებაზე დღეს თავის ყოველწლიურ გამოსვლაში ილაპარაკა საქართველოს პრეზიდენტმაც და ხაზი გაუსვა პოლიტიკური ნების მნიშვნელობას. საკითხავია, რამდენად შესაძლებელია ეფექტიანი რეფორმის გატარება სასამართლო სისტემაში არსებული დაპირისპირებისა და სავარაუდოდ, გავლენის სფეროების შენარჩუნებისთვის ბრძოლის ფონზე? ამ თემაზე საუბრისას პოლიტიკური ნების მნიშვნელობას უსვამს ხაზს „სადისკუსიო მაგიდის“ ერთ-ერთი სტუმარიც. ნინო გელაშვილმა თბილისის სტუდიაში მიიწვია სოფო ვერძეული, "ადამიანის უფლებების სწავლებისა და მონიტორინგის ცენტრის" იურისტი, ინსტიტუციური რეფორმების მხარდაჭერის პროგრამის დირექტორი და ნაზი ჯანეზაშვილი, „საქართველოს მოსამართლეთა ერთობის“ აღმასრულებელი დირექტორი.
